Буго цоги суал нилъей захIматаб
Жиб лъачIого рекIей гьечIеб парахлъи
Нилъер умумузул цебе заманалъ
РухIанияб гIумру киндай букIараб?

ТIадегIанавилан щивдай вукIарав
БетIер сундедай чIвалеб букIараб?
Кинаб дин, щиб иман гьезул букIараб
Лъица гьеб балъголъи нилъей рагьилеб?

Руго гьел суалал жаваб кьун поэтас
Берцинго кьун руго цо кочIолъ гьадин:
... "Унго, мугIрул анищ магIарулалгун
Гаргаризе лъалел рукIине нилъер -
РикIкIун хIал кIоларел лъугьа - бахъинал
Баян гьарилаан гьез нилъей гIемер.

ГIасрабаз чохьонир балъго цIунарал
Рагъазул къисаби цIалилаан гьез...,"
Амма гьел залимал руцIцIухIун руго
Рагьулеб гьечIо гьез балъголъи нилъей.

Бице нижей дуца, Кабалабеса,
Дур мугIрузул ТIинда лъил кулпатчияс
ТIоцебе росдае кьучI лъурабали?
РичIчIе нижей дуца балъгояб гъамас

Щиб иман бугев чи тIоцеве щварав
Гьаб мугIрузул тIинде ТIинди росулъе?