ГIалхулаб дуниял, гьечIеб санагIлъи
Векьарухъанасул хинкIилги кьогIлъи
щвезе гьечIеб кумек киве аниги
Дуцаго мун цIуне, санагIат бате.

МугIрул тIаралъуда цIорой - пуй цIикIкIун
Гьекъолеб лъималъул мукъсанлъи букIун
ГIетI тIун къварилъуда гьабураб дунял
Рехун тезе ккана УнчучIи тIалъи.

ЗахIматаб - къварилъиялъ чурхул кIвекIарал
Зулму - къуваталъе бетIер къуличIел
Къуват - жан бергьарал багьадураца
Балагьизе ккана яшавалъе бакI.

Гьале чанахъаби чIорбутIалги ран
Чанаре рахъула кIи - кIи лъаб - лъаб ккун
Гьедин кьвадулаго гьал гIолилазда
Батула цо нохъо мугIурузул тIинда

Бакъ баккул рахъалъе накIкIил рохь буго
Аза - азар соназ гIашти бихьичIеб
Рохьил рицIцIалъуда тIокIкIараб лъаралъ
Лъугьи гьечIеб сарин буго бачунеб.

Нохъода цебе - нахъ кьурул кьурул чохI буго
Бисаца рештIине тIаса бищараб
Кьурул гохIда гьоркьан Кила гIуруца
Чундузе бачула гьайбатаб сарин.

ГIурумухъалдаса мугIрул тIогьиб щун
Заз - хъарахъгун сага буго бакълъулаб
Бокьараб лъагIалил заманаялъги
Чундузе харидул нахъратIел бугеб.

Нохъода дандабитIун, доюа рикIкIада
Гьаб жаниблъиялъул дун ханилан чIун
ЧIухIараб, залимаб, цIоролаб мегIер
Херав магIарулав, тIингъилъ рещтIарав.

Гьел чанахъабаца къотIи гьабула
Нохъода тIил чIвазе цеве вачIарас
Гьединго ургъула гьаб мугIрул тIинда
Росдае кьучI лъезе херал ахIизе.