Бицуна:

Кьурул щулалъуда Богос мугIрузул
УнчучIи магIарда - Антищебала
БоцIи хIалухъен хьан, санагIат гьабун
Бан букIарабила тIоцебе росу.

Амма гьечIо баян росдал цIаралъул
лъала гIицIго гьелъул дагьабго къисмат
Рекьулел хурзазул ссанаби руго
Росу - минаялъул кьучIалги - нугIзал.

Киналго разилъун мухIкан гьабизе
КIолареб цогиги буго баянги
Гьеб росу лъурасул халкъалда гьоркьоб
Рехсолеб нилъее некIсияб къиса.

Гуржи миллаталъул, Анти цIар бугев
Чанахъан лъаларо, апарогищ гьев?
БетIергьанги гьечIеб тIалъиялда
Бан букIун бугила гохIилъ цо кули.

Гьоркьоб заман индал, росу гIун буго
Ракьалъул гьарзалъи цIикIкIунеб буго
БоцIи -панз кквезеги хайираб буго
ТIабигIатги рекъон ракIал рехона

Гьенив яшав гьабун, лъикI рукIаразул
Разилъи рехсолеб цо бицен буго
Маргьадулъ рехсолеб калам - суалгун
Буголъи тIалъулеб цо калъай буго.

Лъабго яц йикIарай гьеб тIалъиялда
БатIаго боцIи -панз хьихьун бакI-бакIалъ
Гъокье-тIаде цоцахъ щвезе кватIидал
Бугеб хIалги цIехон ахIдулаан гьел.

КIудиялъ ахIун гьоркьохъелъул иш
Кин - сундулъ ийгилан цIехолдулуан
Квасалъ рукъги лъухьун, паракъат йигин
Жегъалабги гьечIин - кьолаан жаваб.

Гьоркьохъей яхуна рукъалъул тIохде
ГьитIинай яцалде гьабула гьаракь
Гьанал бахалъ гьасда цIаги хачадун
Хъизан - агьлуялда йигин ахIулаан

Жиндица иргаялда гьитIинай яцалъ
КIудияй яцалде гьабула ахIи
Радал - бакъаниде бахъараб хIанил
Сангар къалей йигин дунан абула.

Бицуна:

Даран - базаралъе гуржиялъ щварав
Идарав гьобо ун данчIван хадоса
Нусилъа цIикIкIарай херай гуржиялъ
Бекьулищ унчучIан цIехон рагIула

Антищебала росу, УнчучIи мегIер
Рехун танин абун жаваб гьабидал
ГIумру кин гьабулеб бугеб гьанжеян?
Тамашлъун йиго херай гуржияй.