ЦIеберагIи

Жиб-жиб жоялда баккиялъул буго жинди-жиндир тарих. Гьеб лъазе ва цIунизе тIадаб буго инсанасда, амма гIумрудул сухъмахъазда дандчIвала батIибатиял квалквалаз рес кьолеб гьелъие.

ТIинди росдал тарихалъул хIакъалъулъ тIолго Дагъистаналда тIадго бицун батула, амма бицунеб жоялъе мухIканаб кьучI гьечIолъиялъ гьеб хIакъикъияблъун букIиналда щакли баккулеб буго.

Гьелъул тарих хъвараб тIехь букIанилан бицен буго, гьелда рехсон букIун рачIула росдае кьучI лъуразул, тIаде рачIаразул, гьезул яшавалъул баянал. Гьеб тIехь цебеса-цебе кьун, тIаджураял гьарун хъвай-чIали кодоб бугев росдал чиясухъ букIунилан абула. Гьелдаго цадахъ, гьединабго тIехь мажгиталъулги букIун буго. Гьеб дибирас дибирисухъе кьун цIунулеб букIун буго.

Советияб власталъул заманалда гIемерал тахьал рухIун тагIинарун руго. Гьал речсарал тIахьазул къисмат кинабккарабали лъалев чи гьечIо. Гьанжесеб гIелалъул гIагараб росдал тарихалдехун бугеб рокьиги бихьун, пикру ккана, харабаздаги цIехон, биценалги данде гьарун, гьитIинабго хъвай-хъвагIай гьабизе.

Гьалде бицунеб иш букIине кколелдаса батIияб букIинеги бегьила, баянал ракIари кутакалда захIматаб ишлъун батана. Тарихиял баянал рехсолаго, кьучI гьечIеб жо хъвалаго, гьалатIал ккечIого букIунаро, дир гьари буго, ккараб гъалатIалдаса тIасаги лъугьаян, кьучIаб мухIканаб баян нужода кодобе щвани, битIизабун тIаджубайги гьабеян.