Ахир
Хириял дир тIехь цIалулел дие бокьун буго ракI-ракIалъулаб баркала кьезе, дие гьаб тIехь бахъизеги хъвазеги кIудияб кумек жидеца гьабурал, жидер гIакъилал пикрабаз тIехьалъул гIемерисел мухъал ритIизарурал, гIарабалъул хъвай-хъвагIаял гIажамалде руссинаризе квербакъарал:
Р.ГI.А., Д.ГI.Ц., М.Л.И.И-алъул бетIерав гIелмияв хIалтIухъана профессор ХIайбулаевасе С.М.
Р.ГI.А. Д.ГI.Ц., М.Л.И.И-алъул директор-профессор МухIамадовасе М.И.
Р.ГI.А., Д.ГI.Ц. И.А.Э.И-алъул бетIерав гIелмияв хIалтIухъан профессор ШихсагIидовасе А.Р.
"ХIакъикъат" газеталъул бетIерав редактор ГIали Камаловасе.
Шайих Шарапудин КIикIуниясул цIаралда бугеб исламалъул университеталъул мугIалим ИсмагIиловасе А.М.
ДГУялъул гIараб мацIалъул кIиабилеб курсалъул студент Загьидовасе М-З.М..
ДГУялъул интернет централъул администраторал: Халилулаевасе Г.М. ва МухIамадовасе М.Г.
Дун жидедаса разилъарав гIадин ТIадегIанав Аллагьги разилъаги гьал тIадехун рехсарал киназдасаго. ТIадегIанав Аллагьас ахират лъикIаб щун рази гьареги, ракIазул мурадал тIурайги, тIагIат-гIибадат гьабулаго, гьадинал тIахьал рахъизе квер бакъулаго берцинго аги нужер гIумруялъул къоял.
МахIшаралъул къоялъ гьаб дица тIехьалда рехсей гьабурал киназулго: Аварагзабазулги, АсхIабзабазулги, шйихзабазулги вализабазулги устарзабазулги гIалимзабазулги хьолбохъ рахъун чIезе гьареги нилъ киналго. Амин.
Амма тIехь бахъизе квалквал гьабулелги камичIо. Дагъистаналъул динияб идараялъул муфтий ГIабдулаевас тIехьалъе къимат кьезе тIадкъарав идараялъул экспертизаялъул комиссиялъул председатель МухIамадица я къимат кьечо я тIехь бахъизе изну кьечIо. Гьадинал дица тIадехун рехсей гьабурал вализаби накъшубандияб тIарикъаталъул устарзаби рукIинчIиланги абун. ТIадегIанав Аллагьас нижер цояв гьересияв битIун ккезе гьавеги. Дир нугIзалги кьучIал хIужабиги гIемерал руго, тIолго дагъистаналда гуребги Макка - Мадинаялдаса бахъараб Москваялде щвезгIанги гьел тIарикъаталъул камилал муршидзаби рукIиналъе.
Амма кин бугониги ракI унтулеб буго гIурусаздаги, ингилисаздаги, турказдаги, персаздаги, Дагъистаналъул тарихги гьелъул гIасрабазда ккарал лъугьа-бахъиналги дагъистанияздаса лъикI лъалел ратидал. Цо рахъалъин абуни рекIелъ чIухIиги кколеб буго цогидал миллатаз нилъер хIакъалъулъ тIухьдул хъван ратидал, гьелъие мисаллъун дица тIехьалда бахъана Э.А.В-ялъулги (Р.ГI.А.) институтаз 2003 соналъ Москваялда къватIибе биччараб "Ислам цебетIезабулел" абураб тIехьалдаса сурат.
Гьаб тIехьалъе къимат кьезе дица нужеда тIад къалеб буго хириял тIехь цIалулел. Дие бокьилаан нужеца гьалъие жив-живасул пикрияб къимат кьезе районалъулги республикаялъул газетазда ва журналазда. Дица тIехьалда рехсарав лъабавго муршидасул хIакъалъулъ нужеда лъалеб жо батани гьебги загьир гьабизе.
Вассаламу гIалайкум ва РахIматуллагьи тагIала ва баракатугьу.