Независимое информационное агентство «ЦУМАДА.ру» rss tsumada.rutube.ru  rss новости 


Архив новостей , персон

Назад

Васият

(Дир КIиявго васазе - АхIмадие, МухIаммадзагьидие сайгъат гьабула)

Огь, гьаб дунялалъул къокъаб замана,
Берал къанщилелде сордо-къо унеб,
Къанщун рагьилелде арал соназул,
Унгоги гIемерлъи гIадада арал.
Дунялалъул боцIи бечелъиялда
Балагьизе хадув векерараб куц.
КигIан дица данде гьеб гьабуниги,
Гьелъулги батичIо чIараб цо къадар.
БотIрол рас хъахIлъана гьанже вигьана,
Гьогьен чIван батана доб херлъиялъул
Хириял дир васал воре аманат,
Алжан жужахIалъул, ахираталъул,
Ахир нилъ руссунеб бецIаб хобалъул,
Хехгого тIад щвезе бугеб хвелалъул,
Хабалъ гIазабалъул гIемерлъиялъул,
Мункар - Накирасул кIал гьикъиялъул,
Къанал лъун къачIараб доб лахIдуялъул,
Макьилъ ругониги, ригьаниги нуж,
Жакъаги, метерги, щибаб сагIаталъ.
Гьабе гьелъул пикру рекIелъги цIуне,
ЦIакъ захIматаб налъи бугин нилъеда.
Фаризаяб как бай, суннат кIочонге.
КIал ккве, закат бахъе, берцинго хьваде
Хьул Аллагьасдаса ахираталда
Кумек гьабиялда гьебги кIочонге.
КIвар кьун Къуръан цIале, цIуне гIаданлъи,
ГIадамазда гьоркьор берцинго рукIа,
Бесдал лъималазул адабги гьабе,
Гьалбал гIагарлъигун гьуинлъи цIуне.
РекIелъ жахIда-хIусуд, гIамал кIодолъи,
ХIал хъублъи, мацI гьаби, гьереси бицин,
Бугьтан лъей, лъолесда тIад рекъон рукIин,
Нилъей бокьулареб чидае гьаби,
Гьава бергьун чидар ясал ралагьи,
Гьал жалги малги бан дорехун гьаре.
Гьаб дуниялалда хIалалаб боцIи,
Балагьун хIалтIе нуж хIарамабги тун.
ХIал кIолев Аллагьас кьурабги босун,
Бечедал жалго те, мискин рихунге.
РакI билъараб жо кьун пакъирзабазе,
Садакъаги гьабе гьебги налъийин,
Амма эбел-инсуй, гIагарлъиялъе,
Гьабулеб садакъа гьеб цIакъ бергьуна.
Бищун эбел-инсул адабал цIуне
ЦIваккарал гIоркьилал аскIор риччаге,
Чагъиргун гIаракъи гьекъей жибго те,
Чидар налъи тоге, тамахьу цIаге,
ЦIуне бусурманлъи нужор чурхдузулъ.
Нагагь къадарги щун дун цеве хвани
Хвалил сапаралда дун нухде регIе:
Дир рухI бахъулелъул аскIорги рукIун,
РагIиледухъ дида Иллаллагь баче.
Берал къанщаралго къварилъаниги,
Лъалес дун чуризе хIаракат бахъе.
Берцинго лъабго гъат мусруги жемун,
Нужер хIал кIванани хабалъ рекъон лъе.
Къуръан цIализеги лъалев щвечIони,
Нужоца цIализе хIаракат бахъе.
Бераз магIуги тIун тIул ракIги бекун,
КIалалъ Аллагь рехсей магIирокъобги.
МунпагIатго гьечIел чIанда хабарал
Хвалил зигаридул горихъ рицунге.
РекIехъ Аллагьасул аятал цIалун,
ЦIикlкIун къулгьу гьабе гьебин батулеб.
"Бечелъи" цIикIкIарав дун вугин абун.
Воре лъабго къоялъ "бертин" гьабуге.
Гьекъезе-кваназе бокьарал чагIи,
Чидар рокъор регIе гIайиб чIваниги,
ЧIунтарал ракIазе рекIел гъеялъе,
Аллагь гIемер рехсей, садакъа гьабе.
Гьеб зигараялъул гор бихизабун,
Лъабго къоялдаса гьалбал тIоритIе.
ТIокIав вихьулареб дун нухда лъураб,
Хабадеги рачIун ракIалги чуче.
Чамго анкьалъ нужер хIал кIвананани
КIиясго хабада къулгьуги гьабе.
Къуръан гIемер цIале, дун цIунулевин,
ЦIикIкIун хабалъ ругел гIазабаздаса.
Гьаб дица бицараб эбелалъеги,
Гьабизе нужода воре кIочонге.
КIиявго Аллагьас дица малъухъе,
Хьвадизе тавпикъ кьун рохун таги нуж.
Жакъа дунялалда кьураб боцIи-панз,
ХIалалаб батаги ахираталда
Ахир рухI бахъаги рекIелъ имангун,
Алжан насиб гьабе я Аллагь нижей.
ЖужахI рикIкIад гьабе РахIимагьуллагь.
МахIшаралъул къоялъ Аварагасул с.гI.в.
Агьлугин рахъине гьаре я Халикъ.
2005 с.
Назад


© 1999—2013 Сайт культурно-исторического наследия цумадинцев
Техническое и финансовое обеспечение: Магомед ГАДЖИДИБИРОВ и др.         Автор — Магомедгусен ХАЛИЛУЛЛАЕВ
e-mail: director@torgvisor.ru   тел. 8-963-797-40-07 // CMS для этого проекта разработан компанией TorgVisor.Ru
Вариант для печати вернуться в начало сайта
Мнение редакции независимого информационного агентства ЦУМАДА.РУ может не совпадать с мнением авторов статей, которые несут ответственность за достоверность приводимых данных в своих публикациях. Опубликованные материалы могут содержать недостоверные данные. Все материалы данного сайта являются интеллектуальной собственностью их авторов, полная или частичная их перепечатка без разрешения редакции запрещена.