Вай дир мискин пакъир мун къокъунеб къо,
Жакъа гурищ щвараб щиб бугеб дур хIал?
ХIисаб - суалалъе жаваб гьабизе,
Гьунар дур бугебищ малайкзабазе?
Дур рухI бахъарабго лъабго нухалда,
Зодисан ахIулеб гьаракь рагIула.
Ле Адамил лъимер, лъан жаваб гьабе,
Дуца дунял тунищ гьелъ мунго тунищ?
БакIарараб дунял дуцайищ гьелъищ?
Дунял дуца чIванищ гьелъ мунго чIванищ?
Дур черх чурулелъул ахIилеб дуда
Добго лъабго нухалъ зобалаздаса
Ле Адамил лъимер, лъан жаваб гьабе,
Гьанже киб бугеб дур доб къуватаб черх,
Чара тIагIун долъул загIиплъиго щиб?
Щиб ккараб пасихIаб дур кIал-мацIалъе,
БуцIухIун чIараб щай щай кIалъалареб?
ГIундузул гIинкълъи щиб, берзул бецIлъи щиб,
Щай дуй кумекалъе чи вачIунарев?
ХъахIаб мусруялъув мун жемулелъул
Жегиги ахIилеб лъабго нухалда.
Ле Адамил лъимер, рохел буго дуй,
Дур Аллагь разияб гIамал батани,
Балагьги буго дуй дур Аллагьасул,
Цим бахъиги босун унев ватани
Вуссин алжаналда дур батанани,
Буго рохел дуе хун лъугIулареб.
Балагь буго дуе мун жужахIалда,
Вуссунев ватани ахираталда.
Ле Адамил лъимер, мун къокъунелъул,
РикIкIад сапаралде щиб босун бугеб?
Нахъ вуссинго гьечIеб чIегIераб хобалъ,
Хвасарлъиялъе жо бугебищ цадахъ?
Дуй жаназадул как балеб мехалда?
АхIулила лъабго ахIиялъ добго.
Дуца кинаб гIамал гьабун батани,
Бихьулеб дуда гьеб доб махIшаралда.
ЛъикIаб батанани дуего талихI,
Квешаб батанани балагьалъе дуй.
Молода мун лъедал ахIилеб дуда.
Ле Адамил лъимер, рохел буго дуй
Мун тавбоги гьабун дур Аллагьасе,
Гьесдеги мутIигIлъун унев ватани.
Хобал рагIалалда жаназа лъедал
АхIилила добго лъабго ахIиялъ
Ле Адамил лъимер лъан жаваб гьабе
ГьедигIан къачIарал дур рукъзабахъа
Босанищ щибго жо чIунтараб хабалъ
Хайир гIемер щвараб бечелъиялъул.
Гьаб пакъирлъиялде босанищ жого.
БацIцIадаб дунял тун унеб мехалда
Щиб жо босун арав гьаб бецIлъиялде.
БецIаб лахIдуялъув мун лъураб мехалъ
АхIулила добго ахIиялъ дуде
Ле Адамил лъимер мун дир мугъалда
Велъулев вукIараб ракIалда бугищ?
Гьанже мун гIодила гьаб дир чохьонив
Чанги захIмалъаби раччизеги ккун.
Дир мугъалда рекIун гIемер воханин
Гьанже пашманлъила мун дир чохьонив.
Дир мугъалда рекIун гIемер кIалъанин
Гьанже вуцIухIун чIа мун дир чохьнив
БецIаб хабалъ мун лъун халкъ рокъоб индал
Халикъас абила ле дир лагъилан
Лугби сородулеб сабру тIагIунеб
ТIиналда мунги лъун дол нахъе анин
Дозий гIоло дие мун гIасилъанин
Амма дун гурхIулин дуда жакъайин
ГIадан гIажизлъулеб гурхIелалдалъун.
Дир дудехун гурхIел бергьараб бугин
ГурхIел эбел-инсул лъималаздаса.
2005 с.