ЦIунтIадерил "Таня", гIахьвалай "Софья",
Цере умумузул рукIинчIел цIарал
ЦIумадисев "Миша" балъхъвалай "Зоя".
Зодорги ралагьун росарал цIарал.
Хунздерил "Анялгун" лъай-хъвай кканилан,
КIичIардулев "Саша" Унсоколосев".
ЛъаратIисей "Лида", КъахIисей "Шура",
Щай мугIрул кIочонел намус бичулеб?
Гумбеталда гIурай гIанчIай "Елена",
ГIандадерил "Толяхъ" рокьийищ ккараб.
Казбек районалда берцинай "Катя",
Хьергебдерил "Васяхъ" балай бергьунищ.
Баго-чIамалазул чIухIарав "Коля" ,
Инсуца лъураб цIар кIочонищ тараб
Гъуниб мегIералда вижарав "Ваня"
ЧIарадисей "Рая" рекIейищ гIечIей.
Огь цIарал нуж цIарал, магIарул цIарал.
ТIокIцIарал тIадги лъун, тIагIарал цIарал,
Намус-нич бичараз ричарал цIарал
Бихьинчилъи гьечIез риларал цIарал.
1985 с.