Независимое информационное агентство «ЦУМАДА.ру» rss tsumada.rutube.ru  rss новости 


Архив новостей , персон

Назад

Хъуштадерил цIваби


Дида хъуштадерил зобалазда тIад,
Къого цIва бихьула щибаб сордоялъ.
Сонал рахъанагIан цIвабзазул рикIкIен,
ЦIикIкIун гуронани, дагьлъулел гьечIо.
Бищун кIудияб цIва - "ГьичIав" Мусалав,
ГIараб гIелмуялъул цIар арав гIалим.
ГIелму бакIарарал дур гьел тIахьазул,
Дагъистан урхъараб библиотека.
КунчIараб цойги цIва мун, Салимдибир,
Багвалазул наиб Шамилил чIухIи.
Шагьидлъун хвана мун Буртунаялда,
Динул Исламалъул байрахъалда гъоркь.
РекIелъ къвакIи бугев, намус-яхI бугев,
ГIадлу-гIадат лъалев, гIараб цIаларав,
ТIиндадерил наиб, Хъуштадерил цIва -
Закариял ХIажи рагъул багьадур.
КIванада дибирлъун гъов ГIалидибир,
ГIелму-лъай цIикIкIарав, цIар тIибитIарав,
ТIолго гIадамазе гIадлу бащадав,
ГIалимзабазда гъорлъ маржан гIадинав.
ПирмухIаммад-хIажи - диналъул устар,
Сайид ГIободияс маъзунлъун тарав.
Аллагьасе хIелун, Авараг (с.гI.в.) рехсон,
ГIумру жиндир арав Алагьасул лагъ.
ПирмухIаммадил вас ва гьесул маъзун,
ГIелмуялъул байрахъ - хирияв ХIусен.
ХIоцоса Нажмудин жинда мукIурав,
ТIадмагIарулаца хIурмат гьабурав.
Гьесул вас ва маъзун ГIабдуллагьдибир,
Динул исламалъухъ гIумру бичарав.
НКВДялъул мацIихъабакьа,
Вахчаралъув хвана гIалхул нохъода.
Лъабго кунчIараб цIва цо тухумалъул,
Лъабго гвангъараб цIва цо кьибилалда.
Жидер заманалда тIадмагIарулаз,
Мюридлъи гьабуна гьав лъабасего.
ЦIиял гIолохъаби - гьезул ирсилал
Аллагьасе гIоло гIелму цIаларал,
СайидхIусен-Дибир - ПирмухIаммил вас,
СайидхIусен-ХIажи ГIабдулагьил вас
Ва гьезул кьерилав АсланхIажияв
ХIажат ккаралазе кумек гьабулев
РекIехъ къуръан лъалев ГерейхIажияв
ХIасратаб дур калам рагIизеанищ.
ГIараб гIелму цIалун гIорцIараб дур черх
Нижгун данде чIвайги ахираталда.
Ручиясул маъзум - ГъазунхIажияв,
Бурав мегIералда хабалъ вукъарав.
Шапи - ХIажи устар - диналъул хIуби,
ТIарикъаталъул тIехь ургъун бахъарав.
Аллагьасе хIелун мугIрул тирарав,
Таманаб балъголъи рекIелъ цIунарав.
Кашфу-караматалъ кодов восарав,
Вохизаве Аллагь ГIалихIажияв.
ЛъебергогIан соналъ нижер росдае
Дибирлъи гьабурав Мусал Сайпулагь.
ЧIахъа КПССан ахIулел соназ,
Мажгиталъуб вагIза камизе течIев,
ТIолго районалда мажгитал къайдал.
Гьеб цIунизе кIварав Шарапдин-вали
Росдал гIолохъаби - институтазда
Мун МухIаммадсайид гIараб цIалулев,
Гьаб Дагъистаналда гIелму балагьун
Росу батиларо Дур хIетIе чIвачIеб.
Бокьаразда лъалел, лъай жудор бугел,
ГIараб гIелму цIалун цIар тIибитIарал.
Муъмин Гъазиясул МухIаммадсайид,
Загъал ГIабдулагьил МухIаммад-хIажи.
Москва шагьаралъул институталда,
ГIелмабазул доктор ГIабдуразакъов,
Духъ унтун рачIарал тIадмагIарулал,
Сахлъун тIад руссуна Дагъистаналде.
Россиялъул чIухIи - АсхIабов АсхIаб 1,
Академикасул цIар жиндий щварав.
ТIолго дунялалда физикаялъул,
Теория рагьун жив машгьурлъарав.
Рукьбузул, ругъназул больницаялъе,
БетIерлъи гьабулев машгьурав тохтур,
МухIамад ГIумаров, гьел дур кверзукьан,
Чан нус-нус чи арав сахлъизе гьавун?
Анваргин Байтуллагь ИсмагIиловал
ГIадан - инсанасул сахлъи цIунарал
ЦIола инсул мина нуж руссаралго
ГIанди округалъул унтарал шиназ
МухIамад ГIалиев, нижер тамада,
Ингилис мацIалъул цIар арав гIалим,
Чан соналъ гьабураб дуца деканлъи,
Доб чидар мацIазул факультеталъе?
Гъазиясул Рашид - меседил кверал,
Унтаразул анищ, сахазул рохел,
Гьаб Дагъистаналда гьечIо росаби,
Дуца "ругъун" лъечIел гIадамал гьечIел.
Мусалов МухIаммад махшалил хирург
Хуштадерил росдал адаб цIунарав
ЦIар тIибиIана дур доб Россиялда
РикIкIун хIал кIоларел сах гьаруралъухъ
ХIажил Каримулагь, кин бугеб дур иш,
Дур гIараб мацIалъул кафедраялда?
ГIолохъанав доцент, дур цIалдохъаби,
ЩвечIеб букIон бугищ Дагъистаналда?
Вечедов Давудбег, дир росуцояв,
Гьудуллъи бокьулев, гьалбал хирияв,
Доб Избербашалъул педколледжалъе,
Чан соналъ гьабураб дуца бетIерлъи?
Бице, Каримулагь - ГIабдулагьил вас,
Дур бакънал рахинчIеб борхалъи бугищ?
Дур накъираялъул къир-къир рагIичIеб,
Росу хутIун бугищ магIарулазул?
ГIелмабазул доктор ХIажил ХIажияв,
ХIасил лъикIаб буго дур хIалтIиялъул.
Технологиягун-экономика,
ГIолилазда малъи гьеб гурищ талихI.
МагIарула Давуд, дур заманалда,
Дудаса бергьарав бахIарчи кканищ?
Дур гугариялъул бергьенлъабазул,
Биценал хутIана хадур ругезе.
РикIкIад Сиднеялда Олимпиялда,
Бергьенлъи босарав багьадур Сайгид,
Чам батIияб медаль чемпионасул,
Дур каранда бараб, нижер бахIарчи?
Нуж, гьитIинаб росдал кIудиял цIваби,
Нижер гIун бачIунеб гIелалъе мисал.
Нижер история- нижер намус яхI,
ХIалихьатазе нич, бахIарзазе цIар.
Нуж- нижер бечелъи, нижер хазина,
Харабазе рохел, росдае чIухIи.

2000 сон.
Назад


© 1999—2013 Сайт культурно-исторического наследия цумадинцев
Техническое и финансовое обеспечение: Магомед ГАДЖИДИБИРОВ и др.         Автор — Магомедгусен ХАЛИЛУЛЛАЕВ
e-mail: director@torgvisor.ru   тел. 8-963-797-40-07 // CMS для этого проекта разработан компанией TorgVisor.Ru
Вариант для печати вернуться в начало сайта
Мнение редакции независимого информационного агентства ЦУМАДА.РУ может не совпадать с мнением авторов статей, которые несут ответственность за достоверность приводимых данных в своих публикациях. Опубликованные материалы могут содержать недостоверные данные. Все материалы данного сайта являются интеллектуальной собственностью их авторов, полная или частичная их перепечатка без разрешения редакции запрещена.