Независимое информационное агентство «ЦУМАДА.ру» rss tsumada.rutube.ru  rss новости 
Подписка на новости




CAPTCHA Image


Логин@tsumada.ru:
Пароль:


(что это)
Заведите почту на tsumada.ru



Информационный портал «Деловая Махачкала»ALLDAG.ru
maarulal.ru

Архив новостей , персон

Назад

ХIажгун гIумра ва зияратал


Иман-исламалъул рукнабаздасан
ХIалкIолев чиясе хIаж гьаби буго.
Бусурманчиясе хIаж тIалъиялъе
ХIажатал шурутIал гьале гьал руго:
Бусурманлъи буго, балугълъи буго,
ГIакълу букIин буго, узденлъи буго,
Бищунго гьездасан жиб къваригIунеб
Къойилго хIажатаб хIал кIвейги буго.
"Цо хIаж тIубарав чи - фарз тIубарав чи,
КIиго хIаж тIубарав - Аллагь налъулав"
Гьедин хIадис бугин, диналъул вацал,
Фарзгун суннат тIубай, хIал кIвананани.
ЛъабцIул хIажги тIубан тIад вуссарасул,
Черхгун рас хIарамаб доб жужахIалъе.
ХIажалъул арканал анлъгойин ругел,
Гьезул тартиб хвезе тоге кидаго:
ТIоцебесеб - ниййят хIаж бухьиналъе,
ГIарафаталда чIей бухIараб бакъукь.
КагIба рукъ сверухъе тIавафул ифаз,
Сафа-Марваялда гьоркьов хьвадила.
БетIералъул расал тIаса инари
ГIемерисел тартиб цIунун гьарила.
Гьал арканал руго гIумраялъеги
ГIарафаталда чIей гьоркьоса бахъун.
МагIна хIаж тIубалел къагIидабазул
Ибну МасгIудица гьадин бицана:
БацIцIадаб черхалда ихIрам ретIарав -
ХъахIаб мусру ретIун хабалъ лъурав чи,
Черх чурун вацIцIадго жив хьвадулев чи -
Аллагьасе вокьи ракь кIодо гьаби.
Мунагьал чуризе ажру цIикIкIине
Аллагьас нилъ ахIун руго гьоболлъухъ.
Лаббайкайин абун лагъас абидал
Аллагь гIагарлъула дуда аскIове.
ХIажрул асвадалда квер борхи ккола
Бичасулгун дуца гьабулеб къотIи.
Гьес абураб гьаби, те абураб тей -
ТIавафалъул магIна гьеле гьеб буго.
БухIараб бакъукь чIей доб махIшаралда -
Мискинав, бечедав, чIегIерав, хъахIав
РатIа гьаричIого - гьебин ГIарафат.
Аллагьасдаса жив хIинкъулев вокьи,
Илбисалде, гьелъул нухда ругезде
Данде рагъ гьабулеб - чIинхазул магIна.
Мунагьаздаса мун вацIцIалъи буго
БетIер бацIцIад гьабун кIкIваялъул магIна.
ХIаж бухьине мех щвей - Шавал моцI бихьи,
Къурбаналъул байрам къо рогьинегIан
Макканияб микъат хIаж бухьулеб бакI,
Зату ГIиркъи мегIер - Дагъистаналъе.
Гьеб магIарде тIаде самолет щведал
Дуца нийят гьабе, дир уммат цояв.
Ункъго нух дурусаб нийят гьабизе:
Ифрад ТаматтугIан, Къиран ИтIлакъан,
Ифрадалъул магIна хIаж батIа бухьин.
ХIаж тун ГIумра бухьин ТаматтугI буго.
Къиран - ХIажгун ГIумра: кIиябго бухьин.
БатIа гьаричIого цо нийят гьабе.
Нийят гьабилелде черхги чурила ,
БацIцIадаб черхалда ихIрам ретIила,
Руччабаца хъахIаб ретIел ретIила
Релъина хинаялъ гьумергун хIатIал.
Гьабги ихIрамалъул суннатин абун,
КIиго ракагIат бай дур Аллагьасе.
АлхIамалда хадуб Кафирун цIале
Цоги АлхIамалъе Къулгьуги цIале.
Цинги нийят гьабе хIаж бухьизеян.
Къилбаялде вуссин цIакъ хириябин.
ХIаж бухьаралдаса, гьаракьги биччан,
Лаббайка бачина бихьиназ, цIцIуяз,
Амма руччабазе гьаракь борхизе
Бегьуларин буго, воре кIочонге.
ХIаж - ГIумра бухьарал хIажизабазе
ХIарамал жалазул бицен гьабизин:
Бессараб, букъараб ретIел ретIани,
ГIакIа бихьиназда - гIиялжо хъвезе,
Хъураб Къурбан бикье мискинзабазе,
Яги лъабго кIал кквей гьелъул бакIалда.
Бихьинчияс - бетIер, руччабаз - гьумер
Бахчун хьваданани, гьелъухъги гIакIа
ГIадатиял гьуинмахIал гьариги,
РатIлида, бусада, черхалда букIа,
Нах бахи ботIрода магжил расуда
ЧIужугIаданалъе батIалъи гьечIо.
Гьан-мохмох цIодорго квине кколебин,
Квине лъачIонани, добго гIакIайин.
ГIузруго гьечIого малъ, рас тIаса ин,
Жодое, чидае магьари лъейги,
ЧIужу ячи, къочи, къвал бай расанди,
Чан гьаби, гьединго, гьел ричун роси -
Гьал жал гьарунани, гьебго гIакIайин,
Воре цIодорго чIа, диналъул вацал.
Ва амма дуй бокьун жимагI гьабуни,
ХIажги пасалъила ГIумрагун цадахъ.
Цо варани, гIака, анкьго гIиялжо, -
Цояб хIадур гьабе гьеб гIакIаялъе.
Амма пасалъунин хIаж толаребин,
Хехго гIамал гьабе гьеб бецIиялъе:
ХIажалъул тIадал жал цо гьезул тани,
Къурбан хъвей тIалъула яги - анцIго кIал.
КIудаб гъветI къотIани, анкьго гIиялжо
Анкьил бутIа гъотIол - цо гIиялъажо.
Макка-хIарамалъул гъветI-хер къотIиги,
Гьебги хIарамлъула хIаж гьабулезе.
Гьанже мун лъугьина доб Маккаялде,
Бусурманлъиялъул тахшагьаралде.
Расул (с.гI.в.) жанив гIураб мина бихьизе,
Мажгит-ХIарам, КагIба-кинабго лъазе,
Жанив лъугьиналде черхги чурила,
ХIарам бихьарабго дугIа гьабила.
Бабусаламалъул рагьуялдасан
Ина мун Масжидул ХIарамалдеги.
ХIетIе кваранабин цебе босулеб,
КъватIив вачIунелъул квегIабги босе.
Балеб дуца гьанже кIиго ракагIат,
ТахIият тIубазе тIавафалъеги.
ТIавафул Къудумин дуца гьабулеб
КагIба кIодо гьабун гьелъий рецц гьабун.
Бабул ГIурматалъул рагьуялдасан
КъватIивги вахъина тIавафги тIубан.
ГIарафаталда чIун Макка бихьичIес
Къудум гьабиларо, Ифазагь гуреб.
ТIавафалъул цIарал лъабгойин ругел:
Къудум, Ифазагьин, хадуб ВадагIин.
Къудумалъул тIаваф - суннатаб тIаваф,
Ифазалъул тIаваф - фарзин дуй бугеб.
Маккаялдасан дуй сапар бокьани,
ТIадаб буго дуе тIавафул ВадагI.
Дуе бокьанани, суннатаб буго
Ункъабилеб тIаваф хIаж гьабиялъе.
Гьал тIавафал дуе бегьизе ккани,
ТIадал жал рицинин, гIенекке мунго:
ГIаврат бахчи, какичурун мун вукIин,
РетIел-черх бацIцIадго дуца чIезаби.
Руччабазул цо рас яги хIатIил малъ
Цебе баккун хадуб - гьебги гIавратин,
ГIаврат загьирлъани, чури биххани,
ТIаваф жибго тела, чури гьабила.
Гьанже тIадги вуссун щвараб бакI цIехон
Байбихьила дуца тIаваф гьабизе.
ХIажрул Асвад битIун цIараб мухъалда
Вахъун чIун тIавафул нийят гьабила.
Гьабулеб нийаятги КагIба рукъалде
Руссун гьабулебин гьебги кIочонге.
КвегIаб хьибилалда КагIба ккезабун,
Гьабулебин тIаваф анкьго нухалда.
ХIижру ИсмагIилги Шазарванаги,
Гьеб кIиго бакIалда аскIове къаге.
Гьанже дуй бицина тIавафул суннат:
ХIалкIолев бихьинчи хIатIал гIицI вилълъин
Щибаб тIавафалъул авалалдаго
ХIажрул Асвадалда убач гьабила.
Убач гьабизе дур хIал кIвечIонани,
Квералъ ишар гьабун гьелда баила.
Яманияб рукно - гьелде квер хъвазе,
Хъвараб квералдаги убач гьабизе.
Гьарулел дугIаби дуй лъан рукIине,
Дуца тIалаб гьабе гьел гIараб мацIалъ.
Гьелун рилълъунеб бакI дуй лъазе ккани,
Лъабабго цебесеб тIавафалъулъин.
Руччабазе гьели хIажалъуларо
Гьелиларо сагIю гьабуларев чи
Гьели жиндилъ бугеб тIаваф гьабулес
ИзтIибагI гьабизе ссунатин бугеб.
Бихьиназе суннат - КагIба -рукъалда
АскIосан гьабизе гьабулеб тIаваф.
ТIаваф руччабазе къаси гьабизе
Ссунатилан буго, эбги лъай дуда.
ХушугI хIузуралда тIатIала гьабе,
Адабалги гьаре жанисан-тIасан
Зодов, КагIбаялде, я руччабазухъ
Валагьуге, гIодов ракьалде гурев.
ТIадегIанав Аллагь ккве дуца рекIелъ,
Какалда релълъунин гьабулеб тIаваф.
Кваназе, гьекъезе, кIалъазегицин
Карагьатабилан абулеб буго.
ТIаваф гьабун хадуб кIиго ракагIат
Бала Ибрагьимил макъамалда нахъ.
Бай лъугIигун дугIа дуца гьабила,
Зам-замги гьекъела, бетIер чурила ,
ХIажрул Асвадалда убач гьабила.
Бабу Ссафалъусан сагIю гьабила,
Вахина Ссафадул борхалъудеги.
КагIба бихьун нийят дуца гьабила.
Сафа-Марваялда гьоркьов хьвадизе
Нийаяталда хадуб такбир бачина,
СагIю гьабулаго дуда тIалъула
Ссафаялдасан иш башла гьабизе
Гьоркьоб бакI течIого, гIиссин ккун хьвадун
Лъабгогун бащадаб свери бахъила.
ТIаваф къудумалда, я Ифазалда
Хадубин гьабулеб цо нухалъ сагIю.
СагIю Марваялда лъугIизабила.
Гьал руго суннатал дур сагIюялъе:
ГIаврат бахчун хьвади, какие чури,
ГIурччинал чирахъал ругеб бакIалда
Бихьиназе гьели, изтIибагI гьабун;
РекIинчIого хьвади, гIузру гьечIони,
Гьабулеб хьвадиги тIатIала гьаби.
Сафа-Марваялда логол къадаралъ
ТIаде вахинеги суннатин бугеб.
Баче гьениб такбир, зикругун дугIа.
Дица дуй рицина ГIарафаталда
ЧIеялъул адабал ва суннатал жал:
Намраталда черх чури, имамас хутIба гьаби,
Бакъанилги къалъулги, какал жамагIатгун рай,
Как бан хадуб ГIарафаб магIарда чIей хех гьаби,
Авараг (с.гI.в) чIараб бакIги, жодоца тIалаб гьаби.
Бихьинал регун чIела, руччаби гIодор чIела,
Каки чурун рукIина, Къилбаялде руссина.
ЗагIипго гьечIониги, кIал кквечIого рукIина.
Шавагъилаздасаги, паракъаталлъун чIела,
Зикри дугIа тIокI гьабун Къуръан цIали гIемерлъун.
Бищун хирияб дугIа - ГIарафаб къоялъулин.
Гьаракь борхун - бихьиназ, борхичIого - руччабаз
ГIемер лаббайка бачун, истигъфар гIемер гьабун,
Байбихьулеб мехалъги, ва тIубараб мехалъги
ТасбихI, тахIмид, тагьлилги, салат-салам гьабила.
ГIарафаталда бакъукь, чIезе суннатаб буго,
БакътIерхьинегIан чIела, сордо - къо данделъизе.
Садакъа гIемер гьабе, гьардухъан жахIавго те.
Те жахIдаги хIусудги, гIадамал къабихI гьари.
Гьеб къоялъ лъикIаб гIамал, гIемер гьабе, дир гьудул,
Азарго къулгьу цIале, гьарараб жо дуй щвезе.
Гьедин хIадисин бугеб, Аварагас (с.гI.в.) бицараб.
ГIарафаб къо, рузман къо, дуе данде кканани,
Дур мунагьал Аллагьас, Жинцаго чурулила.
АнцIго нухалъ дур хIажги, хирияб букIунила.
Гьелда цIарги гIарабалъ, ХIажул Акбар бугила.
ГIарафаб къоялъул бакъ тIерхьарабго
ТIалъула рачIине Муздалифалде
Мун гьенив кьижуге, гIибадат гьабе,
Гьебин дуй батулеб ахираталда.
ЧIимхал рище дуца гьалил мугь гIадал
Лъабкъоялда анцIго яги цIикIкIунги.
Рогьалил какги бан мун кватIичIого
МашгIар ХIарамалда аскIове щвелев.
Гьебги КъузахIилан гьитIинаб мегIер,
МагIардеги ваха, хIал кIвананани.
ДугIа гьабе, гьарде мун Аллагьасде,
Къилбаялде вуссун рогьинегIан чIа.
Гьениса рилълъина нилъ Минаялде
Бакъбаккун хадуса чIимхал реххизе.
Жумратул ГIакъабат жинда абулеб
ХIобода речIчIила анкьабго чIимих.
ЧIимих речIчIулаго, такбирги баче,
Лаббайка бачинги къотIизе гьабе.
Маккаяб - квегIаб рахъ Мина, кваранаб, -
ЧIимхал рехулелъул гьединин чIолел.
Авараг (с.гI.в.) рещтIараб бакI Минаялда
Дуеги рещтIине рекъараб буго.
Батани, гьадю хъве, цадахъ бачараб.
БатичIони, къурбан хъвезе бегьула.
ЖамагIатгун гуреб цохIо дуцаго
ГIидалъул какги бай, гьебин хирияб.
Къиблаялде руссун бутIрулги кIкIвала,
Малъалги къотIила, къамартIго чIела.
Руччабаз, кIкIвачIого, рас къокъ гьабила
Гьавагун ва жимагI жахIабго тела.
ЗухIадул гIужалда нилъ Маккаялде
ТIавафул Ифаза гьабизе ина.
Гьебги Къурбан къоялъ гьаби хирияб,
Нахъ бахъи абула карагьатабин.
Маккаялдеги ун тIавафги гьабун,
ТIад руссун рачIина нилъ Минаялде.
Минаялда базе дуда тIадабин
КIиго сордогин къо, чIимхал рехулеб.
ЧIимхал рехиялъул шурутIазулги,
Гьел анцIгойин ругел, рехселин дуйго:
ЧIимхал рехи гIужилъ щвей, анкьабго цо-цо рехи,
Лъабабго сиялда щвей, тартибалда жал рехи,
Рехиги анкьцIул гьаби, чIимхал гьецIодул рукIин,
Рехи абун цIар аби, бихьиназ квер борхила
Рехи квералъ гьабила, къасд гьабунги рехила.
ЧIимхал рехиялъе мун гIажизлъани,
Чи тIамила дуца дурго бакIалда.
ТIоцебесеб къоялъ бищун кIудияб
Сиялда речIчIилеб анкьабго чIимих.
КIиабилеб къоялъ лъабго сиялда
Анкь-анкь чIимих речIчIе, къоло цо гIезе.
Гьебго тартибалда кIиго къоялъги
Къоло цо-цо чIимих рехилеб дуца.
Дур чIимхазул къадар анкьцIалияде
Бахине кколеблъи лъазеги ккела.
Гьанже Маккаялде тIад вуссаравго
ТIавафул ВадагIин дуца гьабулеб,
Гьелъул магIна буго КагIба-рукъалъе
Къо лъикI гьаби дуца мун тIад вуссине.
ТIаваф гьабун хадуб кIиго ракагIат
Ибрагьимил макъам - гьелда хадуб бай,
Мултазамалде ун, гьелдаги баун,
Берцинго къвалги бан, гьабила дугIа.
Дур кваранаб кIаркьен гьелда тIадги лъун,
Гьарде Аллагьасда ракI бекиледухъ,
Бекараб ракIалъе дару гьабизе
Зам-зам гьекъезе а баракаталъе.
ХIажрул Асвадалда убачги гьабун,
Гьелда тIад квер лъела нодоги хъвала,
Бабул ГIумраталъул кавуялдасан
КвегIаб хIетIе босун къватIив лъугьина.
Лъай дуда тIадвуссун мун КагIбаялде
Балагьизе дуе бегьулареблъи,
Гьениса ракь босзе гьукъараб букIин,
Амма сайгъаталъе лъим босе дуйго.
Микъаталдасан хIаж бухьин, Муздалифалда сордо бай,
Минаялда сардал рорчIин, Жумраталда чIимхал рехи,
ТIавафул ВадагI гьабиги, - гьелин хIажалъул тIадал жал.
Суннатал жал гьалги руго: хIажгун гIумра батIа букIин,
ИхIрамалъулъ Лаббайк бачин, тIаваф сагIюялъулъ гуреб,
Жиб-жиб чIимих рехулелъул "Аллагьуакбар" абиги.
Дуда лъай цо рукну дуца танани,
Дур хIаж бегьуларо, бецIизе ккола.
ХIажалъул тIадал жал дуца танани,
ГIакIа дуда лъола мунго ворчIизе.
Дуца хIажалдасан босулеб пайда,
Гьелъул дуе щолел дарсал рицинин:
Аллагьасул амру тIубай, Аварагзабазул нух кквей
Ахират ракIалда цIуни дур такъвагун иман цIикIкIин
Нафс дурго бацIцIад гьабиги, Аллагьасе мун хIелиги,
НигIматазе щукру гьаби, щайтIаналдехун рагъ байги,
Дунялалъул бусурбаби, данделъи, цоцазда рихьи,
Лъай-хъвай гьаби, тIаса лъугьин, лъикIаб вацлъи щула гьаби.
Ислам цебе тIеялъеги, цадахъ рекъон хIалтIи гьаби.
Гьоркьоб бугеб хилаф дагIба, жахIда-хIусуд тIагIинаби,
ХIажатазе кумек гьаби ва гьел гурел цогидалги.
Макка шагьаралъе гьаризе кколел
Адабал гьал руго, гIенекке дурго:
Дуца гIумра тIаваф гIемер гьабила.
Рамазан моцIалда ГIумра гьабуни,
Даража цIикIкIараб букIина гьелъул,
Живго Авараггун (с.т.гI.в.) цадахъ гьабураб
ГIумраялда дуе бащалъила гьеб.
ХIарамалда бараб какил хиралъи
Нусазарго нухалъ хириябила.
ХIарамалда жанив мун лъугьунаго
РакIалъ къасдги гьабе Бичасе гIоло
Мажгиталда чIезе ИгIтикафалда.
ГIемер чIанда хабар чIамиялдаса
Аллагьасе хIелун инабе заман.
Зам-зам гIемер гьекъе - къеч буссин гуреб,
Унтабазе дару, дуего сахлъи.
ДугIа къабуллъулел бакIал гьал руго
Макка-шагьаралда сверухълъиялда:
ТIаваф гьабулеб бакIги, Мултазам гонгикь бакIги,
КагIба рокъоб жанибги, Зам-замалда аскIобги,
Сафа-Марваялдаги, гьоркьоб хьвадулеб бакIги,
Макъамалда хадубги, ГIараф мегIералдаги
Муздалифаялдаги, Минаялда жанибги,
ЧIимхал рехулеб бакIги, ГIайишатил мажгитги.
Хабалазда ругел мугIаллаялъул
Зияратазулги баян гьабизин:
Хирияй Хадижат жаний юкъарал
Къузайлил, Далласил хабал ратулел,
ГIемер вализаби жанир рукъарал.
Шайих АбулхIасан жанив рещтIараб
Алавдин шайхасул хобги гьенибго,
Бергьарав гIалимчи цIар, арав устар,
Маккаялъул имам, Мужадид, Вали,
ТIолго гIарабиял жинда мукIурав
Сайид ГIободияв хабалъ вукъарал
Баркат асар бугел мугIрузул баян
Гьабизин нужейго, гIенеккун рихье.
"Абу Къубайс" мегIер Ибрагьим мажгит,
Гьенибго нохъоги "Гъарун канзи", - ян,
Гьеб нохъода жанир Адамгун ХIава
Рукъун ругин абун буго цо хабар.
"Ханда Мат" магIарда рукъун ругила
АнкьцIали Аварагиланги буго.
"ХIираъ" мегIер яги "Жжабалу Ннуран"
Аварагасул(с.гI.в.) нур загьирлъараб бакI.
Гьениб нохъо буго вахIю рещтIараб,
Аварагас (с.гI.в). гIибадатги гьабураб
Гьижра гьабун хIабиб (с.гI.в.) унеб мехалда
"Савру" мегIералъул нохъокь вахчана.
"Сабир" мегIералда рещтIана доб куй,
Аллагьас битIараб Ибрагьимие (гI.с.).
Гьениб нохъо буго "Магъратул фатихI",
ГIибадат гьабураб МухIаммадица (с.гI.в.)
"Сабир" мегIералда дандбитIун буго
"Гъарул Мурсалати" абулеб. нохъо.
ГамачI буго гьениб, Аварагасул (с.гI.в.)
БетIер тункун хадуб гвенд жаниб лъураб.
Зиярат гьабизе жал мустахIикъал
Маккаялъул мажгитазул бицинин:
"Масжидул Ижабат" - гьанже чIунтараб,
"Масжидул жин" буго женазул мажгит.
"Масжидул Шшажарат", "Масжидул Раят",
Макка бахъулелъул байрахъ тIад чIвараб.
"Дарул Гьижрат" - Абубакарил (р.гI.) мажгит,
Авараггун (с.гI.в) гьижраялде рахъараб.
"Масжидул ГIайишат" - ГIайшатил мажгит
Вацгун ГIайшатица гIумра бухьараб.
"Масжидул БиддугIан" Масжид Муттака",
Гьезухъеги лъикIаб зиярат гьаби.
Макка бахъулелъул нилъер Расулас (с.гI.в.)
КъотIи гьабураб бакI, "Сукъул Гъанама".
Баркула дуда хIаж, ХIажиясул цIар,
ЦIаларал дугIаби, гьабураб нийат.
Аза-азаралда бахинабеги,
Бичас къабул гьабун батаги, дур хIаж.
ХIусну Хатимат щун вохизавеги,
Алжан насиб гьабун гьари тIубайги.
Макка-хIарамалъе къо лъикIги гьабун,
Къокъина нилъ гьанже Мадинаялде.
МухIаммад (с.гI.в.) вукъараб, къаникь гьев лъураб,
Бусурманлъиялъул дунялалдаго
Канлъи тIибитIизе чирахъ баккараб,
Бадру УхIудалда рагъал гьарураб;
Хирав ХIабибасул хабадеги щун,
Хадуб гьесул (с.гI.в.) агьлу асхIабзабазул
Хабалазде ине, суннатин бугеб.
Хасго суннатазул ва адабазул
Бицинин дуего, гIенеккун вихье:
Дуца сапар бухье Мадинаялде
Мунго Аллагьасде гIагарлъизелъун.
Нухда салат битIе, Бичасда гьаре
Гьабулеб зиярат къабул гьабеян.
Сапаралда цадахъ - тIадал адабал:
Черх чури, бацIцIадаб ретIелги ретIи,
Мадина хиралъи рекIелъги цIуни,.
Нилъер Аварагас (с.гI.в.) жаниб как бараб,
Гьесул цIаралъ жиндий хиралъи кьураб,
Мажгиталде щведал гьабизе лъикIаб
ХIарамалда гьабун букIараб дугIа.
ГIамал гьабе дуца, Равзаялда чIун,
Минбаралда аскIоб базе тахIият.
ХIавуз буго гьениб, жиндир гIумруялъ
ГIаламалъул ХIабибас (с.гI.в.) какал рараб.
ТахIият барабго, дуй нигIматазе,
Аллагьасдасаги щукру гьарила.
Гьанже тIаде вахъун, Аварагасул (с.гI.в.)
Хирияб хабаде аскIове ина,
Рагьуялде вуссун саламги кьела,
Дуда ХIабиб (с.гI.в) берда вихьулев гIадин.
Гьесул тIадегIанлъи, хабал хиралъи,
Воре, ракIалдаса ине биччаге.
Борхиларо гьаракь, гьабила адаб,
Авараг (с.гI.в) чIагояв вугев гIадинан
Абубакариде (р.гI.) гьабила салам,
Гьуинго адабал цIунила гьесул.
Гьесда аскIов вугев АсхIаб ГIумарий (р.гI.),
Адабалги цIунун, салам гьабила.
Гьеб хабалалъ ругел малакзабазе
Салам кьезе дуда, воре, кIочонге.
КIочон тоге дуда МатIрус малаик,
Гьесин ХIабибасде щвезе гьарулел
ТIолго уматалъул салатгин салам
Сверун нахъги вуссун мун кIиабизе
Авараг (с.гI.в) вукъараб хабаде щвела.
Воре карагьатаб баи, квер бахъи.
Берцинго гьарила: ХIабибас (с.гI.в.) дуе
ШапагIат гьареян Аллагьасдасан.
Къилбаялде вуссун дугIа гьабила
Дуе рокьаразе, мун вокьаразе,
РакIалдаса ине биччаге дуца,
ХIабибасул (с.гI.в.) мажгит, рай какал гьенир.
Гьенир какалги ран игIтикафалда
Ннййят гьабун гьарде мун Аллагьасда.
Гьанже БакъигIалъул хабаде ина.
Амма вагьабияз гьел хабалазул
Майдан гьабун буго, заналги рахъун.
Рузман къо цIакъ лъикIаб зияраталъе,
ФатIиматидасан (р.гI.) байбихьи гьабун,
Гьелъул вац Ибрагьим (р.гI.) тIоцеве гьавун,
Яцал Умукусум (р.гI.) Рукъият (р.гI.), Зайнаб (р.гI.)
Гьездеги зиярат рекъараб буго.
АнцIазарго АсхIаб (р.гI.) гьеб БакъигIалда
Нужода лъалезде гьабе зиярат.
ГIабасиде (р.гI.) гьабе ХIасанидеги (р.гI.)
ХIусенил вас ЗайнулгIабидидеги
Гьесул вас МухIаммадул Бакъириде,
Гьесул вас ЖахIфарул Ссидикъидеги.
Асадил ФатIимат, - гьелдеги гьабе,
ХIарисил вас Абусуфянидеги,
Гьабе ГIукъайлиде АбутIалибил.
ГIавфул ГIабдурахIман, Вакъассил СагIдо
Гьездеги зиярат рекъараб буго.
ХIабибасул агьлу (с.гI.в.) руччабаздеги:
ГIаишатгун (р.гI.), ХIабсат (р.гI.) Марият (р.гI.), (Савдат (р.гI.)
Умму Салматиде (р.гI.), Жувайратиде (р.гI.),
ХIузайматил Зайнаб (р.гI.), Умму ХIабибат (р.гI.)
ЖахIсил Зайнабиде (р.гI.), Сафиятиде (р.гI.),
Ахиралда ккарай РайхIанатиде (р.гI.).
Гьездаса хадубго зиярат лъикIаб
Имам Маликиде, МагIзил СагIдуде,
Сайид Маликиде, МухIаммадиде,
Гьевги АсхIабгIалил ХIасанил васин.
Дир Дагъистаналъул лебалаб гъалбацI,
БахIарчияв имам Шамил кIочонге,
КIалалъ Аллагь рехсон лъеберго соналъ
Сири базабунин капурзабазда,
Кинабго Дагъистан диналъе гIоло,
ГIумру кьун, рухI бичун рагъде бачанин.
Зиярат гьабизе хамиз къоялъ мун
УхIудалде ина Шугьадаазухъ.
Гьенив вукъун вуго рагъул бахIарчи,
Бергьун къвакIи бугев ракIалъул ХIамзат.
ГьатIан къоялъ къокъа мун Къубаялде
Арисалъул лъеца каки чуризе.
Гьениб мажгиталда тахIиятги бан,
ТIад вуссун вачIина Мадинаялде.
Мадиналда ругел мажгитаздаса
Зиярат гьабизе хириял руго:
"Къубаялъул мажгит", "Масжидул жумгIат",
Рузман Аварагас (с.гI.в.) тIоцебе бараб.
"Масжидул ФазихI" ва "Бани Къурайзат",
Мариятидасан (р.гI.) Аварагасе (с.гI.в.)
Ибрагьим (р.гI.) гьавураб бакIалда бугеб,
"Масжидул Машрабат" абулеб гьелда.
Лъабго жо гьаридал Расулуллагьас (с.гI.в.)
Аллагьас кIигояб къабул гьабураб,
БакIалда бан буго "Масжидул Ижаб",
"Масжидул Багълати", "Масжидул ФатхIи",
Къаде как балелъул МухIаммадие (с.гI.в.)
КIиго къилба цебе лъугьараб мажгит -
- "Масжидул Къиблатай" буго гьелда цIар;
Бадруялде ине бо къачIалелъул
ХIабибас (с.гI.в.), какги бан, дугIа гьабураб,
Гьелда цIарги буго "Масжидул Сукъя",
УхIуд мегIералда хурхараб мажгит.
"Жжабалу Рруманат" абула гьелда.
ХIамзат гIодов ккараб "Масжидул Вади"
Аварагас (с.гI.в.) какги бан буго гьениб.
"Аби Заррил Гъаффар" гьеб мажгиталда
Аварагас (с.гI.в.) сужда гьабун рагIула.
Авараг (с.гI.в.), лъим гьекъон, каки чурарал
Гвендазул бицинин зияраталъе:
Къубаялда - Арис, Биъру "Гъарс", "ХIаин",
Биъру "Буссат", "ГIифни" Биъру "БизагIат" -
БизагIаталъул лъим цIакъ беццун буго:
Лъабго къоялъ дуца черх чуранани,
Гьелъ дуй унтуй дару гьабилин буго.
Заман бугонани, машгьурал бакIал
Зиярат гьабизе гIемерал руго.
Амма хIал кIвечIони, Аварагасда (с.гI.в.).
АскIовги чIун босе дуего давла.
Ахиралда дуца къо лъикI гьабила
Хираб мажгиталда жанивги лъугьун,
ХIабибасул (с.гI.в.) хIавуз бугеб бакIалда
Базе гIамал гьабе кIиго ракагIат.
АлхIамалда хадуб Кафирун цIале,
Цоги АлхIамалъе Къулгьуги цIале.
Мажгиталъул вадагIазул суннатин
Гьабила ниййятги как бухьунелъул.
Дуего бокьараб дугIа гьабила,
Ахиралда салат салам битIила,
Байбихьи тIоцебе гьабураб гIадин,
ХIабиб МухIаммадил (с.гI.в.) хабаде ина.
Пашманго хIелила, хIалкIун гIодила,
Расулгун (с.гI.в.) ватIалъи рекIейги бакIлъун.
Бусурманлъиялъул байрахъ тIад бугеб
Мадина теялда унтила дур ракI.
РекIел къварилъиялъ къвал дудаги бан
Бухье дуца сапар Дагъистаналде.
ХIабиб МухIаммадил (с.гI.в.), АсхIабзабазул (р.гI.),
Агьлу-хъизаназул, варисзабазул,
Вали, шайхзабазул, устарзабазул,
МугIалагун БакъигIалда хваразул,
Бадру УхIудалъул Шугьадаазул
ШапагIат нилъее щвезе батаги,
БатIаго нужеде дир гьари буго
ДугIаялъулъ дунги гIахьал гьавеян,
Гьаб насихIат нужой цIаларав пакъир
Загьидил МухIаммад кIочон тогеян.
1998 с.
Назад


Метки персоналии, новостей и фоток!
Абдурахман, Литература, Сироти, Ювенал, Спорт, Сагада, Абдулхабиров, На аварском, Публикации, Связь, Видео, Согратль, Харайчо, Анди, Кокрек, Инхо, Абдлухабиров, Кавказ, Кочали, Хонох, Сажид, Атлетика, Медицина, Тленхори, Сагада, Гигих, Стройка, Культура, Персона, Защитники, Саситли, Ущелья, Ричаганих, Нижнее Хваршини, Цедатль, Стихия, Мечети Багвалал, Стройка, Я-Политика, Мечети Тиндалал, Водопады, Гакко, Лесные, Хварши, Хварши, Акнада, Мечети Чамалал, Ургелой (Аркискент), Цумада, Нижнее Гаквари, Ислам, Кенхи, НЕ_ИЗВЕСТНО, Гимерсо, Хуштада, Аулы левобережья, Фанклуб, Утварь, Саситли, Быть, Эчеда, Водоемы, История, Хуштада, Кеди, Ремесло, Саильди, Инхоквари, Тисси, Школы левобережья , Фауна, Персона, Сильди, Селения, Этнос, Ангида, Кенхи, Нижнее Гаквари, Села в Хасе, Ахират, Тлондода, Квантлада, Хваршини, Цумадинцы, Мосты, Чонтаул, Шава, Иллюстрации, Религия, Хутор, Тиндалал, Кутан, Спорт, Турнир Кади, СельХоз, Награждение, Ретро, Туризм, Новости, Тинди, Сантлада, Гигатли, Образование, Война, Пейзаж, Горы, РетроПерсона, Тилси, Школы правобережья, Стихия, Кутан Акнада, Флора, Цунтаккал, Транспорт, Кванада, Объекты, Атлетика, Верхнее Гаквари, Мечети в Ункратле, Кеди, Школа, Минарет, Тинди, Мероприятия, Джамаат, Аулы правобережья, Кванада, Мечети на равнине, Борьба, Акнада, Спортсмены, Тлондода, Школы на равнине, Природа, Цыхалах, Гакко, Аща, Реки, Чествование, Альпинизм, Инхоквари, Собрания, Чамалал, Цумада Урух, Верхнее Хваршин, Гигатли, Мельницы, Хонох, Фотки, Верхнее Гаквари, Хвайни, Судейство, Лес, Эчеда, Тисси, Гимерсо, Этнос, Гадири, Санух, Гьаквари ккал, Агвали, Медицина, Гадири, ПроНас, Хушет, Тисси-Ахитли, Метрада, Тенла, Агвали, Тазият, Махач, Газета, Санух, Гигатли Урух, г.Хасавюрт, Мечети в Эхедемухъ, Туризм, Гачитли, Природа, Турнир Абакарова К., Самбо, Хъулухъ, Новосаситли (Хас. р-н), Осетия, Ботлих, Гергебель, Теречное, Медресе, Ветеран спорта, Сагид, Поздравления, Конкурс, , Урари, Зашитники, Стих, Наука, ДТП, ,

© 1999—2013 Сайт культурно-исторического наследия цумадинцев
Техническое и финансовое обеспечение: Магомед ГАДЖИДИБИРОВ и др.         автор проекта — Гусен ХАЛИЛУЛЛАЕВ
e-mail: gusen_ha@mail.ru   тел. 8-963-79-74-007 skype: gusen76
Вариант для печати вернуться в начало сайта
Мнение редакции независимого информационного агентства ЦУМАДА.РУ может не совпадать с мнением авторов статей, которые несут ответственность за достоверность приводимых данных в своих публикациях. Опубликованные материалы могут содержать недостоверные данные. Все материалы данного сайта являются интеллектуальной собственностью их авторов, полная или частичная их перепечатка без разрешения редакции запрещена.