Независимое информационное агентство «ЦУМАДА.ру» rss tsumada.rutube.ru  rss новости 
Подписка на новости




CAPTCHA Image


Логин@tsumada.ru:
Пароль:


(что это)
Заведите почту на tsumada.ru



Информационный портал «Деловая Махачкала»ALLDAG.ru
maarulal.ru

Архив новостей , персон

Назад

ЦеберагIиялъул бакIалда


ТIоцее дир эбел, хадув дир эмен

ГIагарал, божарал, дир росуцоял,

ГьитIинаб дир ватIан, мун дир Дагъистан

Дун нужер налъулав нужер ирсилав.



ЦIумада районалъул Хъуштада росулъа Загьидил МухIаммадхIажияс хъварал кучIдул цIалидал, цо рохалилаб асар гьабуна дие. Бихьулеб буго гьеб магIарул росдал гьайбатаб тIабигIаталъги, гIелму-лъаялде жидер рокьи бугел росуцоязул мисалазги, авторасул ракIалъе жеги гьитIинго шигIрияб асар гьабурабги. Гьев сверухъе кколел ругел лъугьа-бахъиназ пикраби гьаризе тIамуравлъиги, гьесулъ гьеб киналъего жиндирго къимат кьезе бажариги нилъее загьирлъулеб буго МухIаммадхIажиясул кучIдул цIалидал.

ШагIирасул асаралги, аслияб къагIидаялъ, релълъарал руго жиндирго заманалда, гьенир кколел рукIарал ва ругел лъугьа-бахъиназда. "Заманаялъул матIуялде" сверулел руго гьесул гIемерисел асарал. РакI-ракIалъ хъварал гьез нилъер ракIазеги гьабулеб буго гьебго рохалил асар.

РачIаха мисалалги рачун, гъорлъе раккилин МухIаммадхIажиясул асаразда:

Жакъа магIарулазул яхI-намусалъулги, гьезул рукIа-рахъиналъулги пикраби гьарулаго шагIирас бухулеб буго рахIатхвей загьир гьабулеб кочIол цIумур, нилъ киналго рекIеда ратизелъун, нилъ кантIизелъун:


... ЦIунтIадерил "Таня", гIахьвалай "Софья",
Цере умумузул рукIинчIел цIарал:
ЦIумадисев "Миша", Болъихъа "Зоя"
Зодорги ралагьун росарал цIарал,
Хунздерил "Анялгун" лъай-хъвай кканилан
КIичIардулев "Саша" - Унсоколосев.
ЛъаратIаса "Лида", КъахIиса " "Шура",
Щай мугIрул кIочонел, намус бичулеб?...
 

Инсанасул гIумру цIакъго пайда гьечIеб ва иххлъун чваххун ун батулеб жо букIин бичIчIизабизелъун МухIаммадхIажияс цIалдолезе гьадинаб хитIаб гьабулел рагIаби абулел руго.


Гьанже киб бугеб дур доб къуватаб черх,
Чара тIагIун долъун загIиплъиго щиб?
Щиб ккараб пасихIаб дур кIал-мацIалъе
БуцIцIухIун чIчIараб щай, щай кIалъалареб,
ГIундузул гIинкълъи щиб, берзул беццлъи щиб,
Щай дуй кумекалъе чи вачIунарев?...
 

ВахIшияб заманалъул сипат цебе чIчIезабизелъун МухIаммадхIажияс абулеб буго:


... Нилъер улкаялъул цIадирабазда
ГIадан-инсанасул багьаго гьечIо.
ЧIвала, цIорон хола, унтула хола,
"Халкъалъул инсуда" рагIи абуни,
Рачун жанир лъола, тIагIинарула,
ГIадан-инсанасул винтик гьабураб
Машина ургъараб аздаго щиб?
 

Сибиралда ккарал дагъистаниязда букIараб ахIвал-хIалалъул бицунаго авторас гьадинаб сурат бахъулеб буго:


... Рохьор хIалтIулезул угьди-зигарди,
Туснахъ цIунулезул цIалазулги гуч.
АмурЛАГ, тайга ЛАГ, гIазабазул ЛАГ,
ГIадан хIайваназде сверизарулел,
Соловкал, заводал, лаГАЛ, ГУЛАГАЛ.
Унго, дунялалда батани жужахI,
ЖужахI гьаниб буго гьал лагеразда...
 

Таварихгун тарихалъе жиндирго шагIирасулаб къимат кьей гуребги, авторас нилъее рагьулеб буго Дагъистаналъул имам бахIарчияв Шамилихъ рокьи ккарай арменияй ШугIайнатил гIищкъул цIа рекIараб гьайбатаб сипатги.


... - Дий дин хIажат гьечIо, хирияв имам,
Духъ ккараб рокьиялъ йиго йухIулей.
Эркенлъи кIваричIо, хIасратав гьудул,
Дуда къвал жемараб сагIат бачIани...
 

Яги:


Дур аварагасе дун мукIурлъила,
Берцинал беразда убач гьабуни.
Дур Аллагь восила, бусурманлъила,
РекIей къабулав мун къвал бан вегани.
 

МухIаммадхIажиясул асаразда гъорлъги камун гьечIо загIипал мухъалги, мацIалъул мукъсанлъи цебе рехизарулел бакIалги. Амма гьеб киналъухъго балагьичIого, тIехьалда руго гIемерал пикру гьабизе тIамулел, умумузул тарихги, гьезул къисматги цIалдолезда ракIалде щвезарулел асарал.

ГIемерал руго магIарул яхI-намусалъулги, рухIияб хъарцинлъиялъулги бицунел мухъалги...

Гьединго, Загьидил МухIаммадхIажиясул тIехьалда кIудияб бакI кколеб буго гьесул гIагараб Хъуштада росулъ рахъарал цIар рагIарал гIалимзабазулги, цо-цо Дагъистаналъул устарзабазулги бицунел назмиял асаразги.

Гьеб кинабго данде босараб мехалда, кколеб буго халкъалъе, хасго гIун бачIунеб гIолохъанаб гIелалъе, жиндир пайда цIикIкIараб тIехь.

РакIалде ккола гьаб Загьидил МухIаммадхIажиясул тIехь магIарулаз гъираялда къабул гьабилилан ва гьеб гIадамазе пайдаяблъунги лъугьинилан.

Хьулги буго гьес жиндирго шигIрияб гьунар жеги камил гьабизе хадубккунги хIаракат бахъилилан. Пикру "квегъизеги", мацI "буцIизеги" шагIиразда тIадаб букIин МухIаммадхIажиясда кидаго кIоченарилан.


МухIаммад ГIабдулгIазизов,

Россиялъул Хъвадарухъабазул

Союзалъул член.

I5.I0 2005 с.

Назад


Метки персоналии, новостей и фоток!
Абдурахман, Литература, Сироти, Ювенал, Спорт, Сагада, Абдулхабиров, На аварском, Публикации, Связь, Видео, Согратль, Харайчо, Анди, Кокрек, Инхо, Абдлухабиров, Кавказ, Кочали, Хонох, Сажид, Атлетика, Медицина, Тленхори, Сагада, Гигих, Стройка, Культура, Персона, Защитники, Саситли, Ущелья, Ричаганих, Нижнее Хваршини, Цедатль, Стихия, Мечети Багвалал, Стройка, Я-Политика, Мечети Тиндалал, Водопады, Гакко, Лесные, Хварши, Хварши, Акнада, Мечети Чамалал, Ургелой (Аркискент), Цумада, Нижнее Гаквари, Ислам, Кенхи, НЕ_ИЗВЕСТНО, Гимерсо, Хуштада, Аулы левобережья, Фанклуб, Утварь, Саситли, Быть, Эчеда, Водоемы, История, Хуштада, Кеди, Ремесло, Саильди, Инхоквари, Тисси, Школы левобережья , Фауна, Персона, Сильди, Селения, Этнос, Ангида, Кенхи, Нижнее Гаквари, Села в Хасе, Ахират, Тлондода, Квантлада, Хваршини, Цумадинцы, Мосты, Чонтаул, Шава, Иллюстрации, Религия, Хутор, Тиндалал, Кутан, Спорт, Турнир Кади, СельХоз, Награждение, Ретро, Туризм, Новости, Тинди, Сантлада, Гигатли, Образование, Война, Пейзаж, Горы, РетроПерсона, Тилси, Школы правобережья, Стихия, Кутан Акнада, Флора, Цунтаккал, Транспорт, Кванада, Объекты, Атлетика, Верхнее Гаквари, Мечети в Ункратле, Кеди, Школа, Минарет, Тинди, Мероприятия, Джамаат, Аулы правобережья, Кванада, Мечети на равнине, Борьба, Акнада, Спортсмены, Тлондода, Школы на равнине, Природа, Цыхалах, Гакко, Аща, Реки, Чествование, Альпинизм, Инхоквари, Собрания, Чамалал, Цумада Урух, Верхнее Хваршин, Гигатли, Мельницы, Хонох, Фотки, Верхнее Гаквари, Хвайни, Судейство, Лес, Эчеда, Тисси, Гимерсо, Этнос, Гадири, Санух, Гьаквари ккал, Агвали, Медицина, Гадири, ПроНас, Хушет, Тисси-Ахитли, Метрада, Тенла, Агвали, Тазият, Махач, Газета, Санух, Гигатли Урух, г.Хасавюрт, Мечети в Эхедемухъ, Туризм, Гачитли, Природа, Турнир Абакарова К., Самбо, Хъулухъ, Новосаситли (Хас. р-н), Осетия, Ботлих, Гергебель, Теречное, Медресе, Ветеран спорта, Сагид, Поздравления, Конкурс, , Урари, Зашитники, Стих, Наука, ДТП, ,

© 1999—2013 Сайт культурно-исторического наследия цумадинцев
Техническое и финансовое обеспечение: Магомед ГАДЖИДИБИРОВ и др.         автор проекта — Гусен ХАЛИЛУЛЛАЕВ
e-mail: gusen_ha@mail.ru   тел. 8-963-79-74-007 skype: gusen76
Вариант для печати вернуться в начало сайта
Мнение редакции независимого информационного агентства ЦУМАДА.РУ может не совпадать с мнением авторов статей, которые несут ответственность за достоверность приводимых данных в своих публикациях. Опубликованные материалы могут содержать недостоверные данные. Все материалы данного сайта являются интеллектуальной собственностью их авторов, полная или частичная их перепечатка без разрешения редакции запрещена.