Дун гIатIиракьалде вахъанин абун,
Дихъа нахъ бахъуге магIарул гIадат.
Гьаниб гIодоблъуда рукъ ккун чIанилан,
ЧIваге диде гIайиб гIагараб тIалъи.

Дир урхъи буссине рес гьечIел мугIрул,
МагIарул мацI цIуне дир наслабазе.
Дие кколеб бутIа- ирс бикьулелъул,
Дир намусги цIарги дида хадуб те.

Дир инсул росу те, росдал кулал те,
РоцIарал зобал те, цIадал щеней те.
ЦIад бан хадуб чIвалеб чIурканаб нур те,
Харда шуршудулеб щобил гьури те.

Щобдасан баккулеб багIараб бакъ те,
Бакъй керен кьурал кьурул парсал те.
Росу бихьулелъув цо сасизе те,
Санда гIодов вукIун кечI ахIизе те.

МугIрул щобал гирун гьоболлъухъ щведал,
Росдал годекIаниб ганчIиде бакI те.
Гьобол гьудуласул хIурмат кIудияб,
МагIарул хирияб халкъги дие те.

Къаси моцIрол канлъухъ хурзал лъилъулел,
Ясазе гул къалев гвавулъеги те,
Горда гъоркь гIодов чIун гIолилясазе,
Умумузул макъан тIамизеги те.

Лъараца босун ун бащдаб хутIараб,
Дир росдал сверуда свак чучизе те.
Будунас ахIулеб какиде гIин чIван,
КъулгIадухъ ганчIиде гIодов чIезе те.

ХIорихъ байданалда харицел хьвагIун,
Харил гъунал чIвазе гъира буго дир.
Беричал щобазде гIадра кваналел,
ГIиял рихьизеги хьул бугоан дир.

Те дие цIар араб ЦIумада район,
ЦIвабзазда жал цурал рорхатал мугIрул.
Те дие хирияб умумузул ракь,
Гьенисан- дие кечI ахIулеб гьаракь

Те дие кечI хъвазе бегIераб къалам,
Къойилго рагIизе магIарул калам.
Кье дие мугIрузде вахине сахлъи,
МагIарул халкъалъе- даимаб вацлъи.