Дунял биханиги жагъаллъулареб,
Щулияб иманалъ бечелъаги нуж.
ГIелмуги гIемерлъун гIакълуги цIикIкIун,
Сабруги гьарзалъун берцинлъаги нуж.
ЛъикIал тIабигIатал чорхолъ гIемерлъун,
Расуласул нухда ритIун ккаги нуж.
Росдал агьлуялъул иман цIикIизе,
Аллагьасго нижей кьун ратаги нуж.
Къуръан хIадисалъул хIукму къотIизе,
ГIалил зулфукъарлъун рачIун ратаги.
Ишкалабщинаб жо щибаб рекIелъа,
Щвараб гIоролъгIадин унел ратаги.
Загьирги батIинги батIа гьабулел,
Иманги Исламги тIокIкIизабулел,
ЧIунтарал ракIазда иман тIинкIулел,
ТIагьа разилъулел васал ратаги.
Росдалго жамагIат жеги цолъизе,
Церехъанлъиялъе кверги бакъаги.
Исламалъ какарал квешал пишаби,
Кинацаго тезе сабабги ккайги.
Нужер гIелмуялъул гIурулъ чвердезе,
ГIолохъанаб гIелалъ гIамал гьабеги.
ГIарабустаналда щвараб лъаялъул,
Лъарал гIорал лъугьун Дагъистан цIейги.
Нужер вагIзаялда гIенеккаразе,
ГIумар асхIабасул ритIухълъи щвайги,
Хадуб как балезул каранзуниб ракI,
Абубакрил гIадин иманалъ цIейги.
Расуласул суннат чIаго гьабулел,
Халикъасул къуръан гьуин гьабулеб,
ХIукму-фатваялъе тIаса рищулеб,
ТIолгоял разияб тIабигIат кьеги
Бичасдасан хIинкъун хIарамаб тезе,
ХIабибасул нухда тарунгутIизе,
БидгIиябщинаб жо квер хьвагIун тезе,
Тавфикъ кьеги Аллагь нилъ киназего.